KSÍ er 66 ára í dag

Í dag eru 66 ár liðin síðan að fjórtán félög og íþróttabandalög stofnuðu Knattspyrnusamband Íslands 26. mars 1947. KSÍ minnist þessara tímamóta á heimasíðu sinni í dag.

Agnar Klemens Jónsson var fyrsti formaður KSÍ en núverandi formaður, Geir Þorsteinsson, er sá áttundi í röðinni. Geir tók við af Eggerti Magnússyni árið 2007.

Þegar haldið var upp á 50 ára afmæli KSÍ árið 1997 var gefin út bókin "Knattspyrna í heila öld" eftir þá Víði Sigurðsson og Sigurð A. Friðþjófsson. Í þeirri bók er þannig sagt frá stofnun KSÍ:

Stofnfundurinn var haldinn við Vonarstræti í Reykjavík (mynd), þar sem umhverfisráðuneytið er nú til húsa. Fimmtán fulltrúar frá tólf félögum mættu á fundinn; Fram, KR, Víkingi og Val úr Reykjavík, Haukum og FH úr Hafnarfirði, Kára og KA frá Akranesi, Þór og KA frá Akureyri og Þór og Tý frá Vestmannaeyjum. Auk þess óskuðu Íþróttabandalag Ísafjarðar og Íþróttabandalag Siglufjarðar eftir því að taka þátt í stofnun KSÍ, en þau gátu ekki sent fulltrúa á fundinn. Alls voru því félög og íþróttabandalög sem áttu aðild að KSÍ frá byrjun 14 talsins.

Íslenska 21 árs landsliðið getur fært KSÍ afmælisgjöf í dag því strákarnir mæta liði Hvíta Rússlands í dag í fyrsta leiknum í riðlakeppni EM 2015. Leikið verður á Torpedo vellinum í Minsk og hefst leikurinn klukkan 13.00 að íslenskum tíma.