Ofurlúði fær yfirhalningu

Leikarinn Jim Parsons er þekktastur fyrir að leika vísindamanninn Sheldon Cooper í sjónvarpsþáttunum The Big Bang Theory. Hann er þó víðsfjarri karakter sínum í nýjasta hefti tímaritsins GQ.

Þessi 39 ára gamli grínari sýnir þar sínar bestu tískuhliðar og er ansi hreint smart þegar hann tekur sig til.

Jim hefur unnið til tveggja Emmy-verðlauna og hefur hreppt ein Golden Globe-verðlaun fyrir túlkun sína á Sheldon og er með á hreinu hverju maður á ekki að klæðast á verðlaunahátíð.

"Karlmaður ætti aldrei að vera í stuttermabol á verðlaunahátíð. Tja, nema þú fílir að vanvirða jafningja þína, þá sem þú vinnur með og þér eldri menn. Kýldu þá á það," segir hann. Hann bætir við að það sé erfitt að taka tapi vel.

"Ég brosi, kinka kolli til samþykkis og klappa. Andlitið á mér titrar í lok kvölds því ég brosi svo mikið þannig að mig langar alltaf að leggja mig eftir svona athöfn."

Þú gætir unnið - vertu með okkur á Facebook.