Sá yngsti endurráðinn - Halldór áfram með Tindastól

Halldór Jón Sigurðsson, kallaður Donni, hefur skrifað undir nýjan tveggja ára samning um að þjálfa áfram meistaraflokk karla hjá Tindastól en þetta kemur fram á heimasíðu félagsins.

Halldór Jón tók við liðinu árið 2011 og stýrði því til sigurs í C-deildinni það sumar. Tindastóll endaði síðan í 8. sæti í b-deildinni síðasta sumar.

Halldór Jón er aðeins 29 ára gamall og var yngsti þjálfarinn í Pepsi-deild og 1. deild karla á síðustu leiktíð.

"Síðastliðið sumar stýrði hann liðinu í þeirri deild þar sem liðin spilaði oft á tíðum gríðarlega skemmtilegan fótbolta og vakti athygli margra. Mikil ánægja hefur verið innan liðsins með Donna og stjórn knattspyrnudeildarinnar er ekki síður ánægð með störf hans á síðustu árum," segir í fréttinni inn á heimasíðu Tindastóls.