Biður pönkurum vægðar

Vladimír Pútín Rússlandsforseti hvetur rússneska dómara til að fara mildum höndum um femínistana í pönkhljómsveitinni Pussy Riot, sem gerðu usla í helstu kirkju rússnesku rétttrúnaðarkirkjunnar í Moskvu í vor.

Réttarhöld yfir þeim hófust í vikunni, en þær hafa verið í gæsluvarðhaldi frá í mars. Þær lýstu sig saklausar af ásökunum um óspektir vegna trúarhaturs, en sögðust aðeins hafa viljað koma á framfæri andstöðu sinni við Pútín forseta.

Pútín hefur verið í London undanfarið að fylgjast með júdóglímu á Ólympíuleikunum og sagði þar að framferði þeirra hefði verið slæmt, en að þær ættu ekki skilinn þungan dóm.- gb