Fyrsti GR-ingurinn til að vinna í 27 ár

27 ára bið GR-inga eftir Íslandsmeistaratitli er loksins á enda. Haraldur Franklín Magnús, 21 árs kylfingur afrekaði í gær það sem öllum karlkylfingum GR hefur mistekist frá árinu 1985 – að verða Íslandsmeistari í golfi.

Valdís Þóra Jónsdóttir úr Leyni varð Íslandsmeistari kvenna en hún var að taka stóra titilinn í annað skiptið á ferlinum því hún vann hann líka í Grafarholtinu 2009. Það var mikil spenna í bæði karla- og kvennaflokki og dramatíkin mikil á lokaholunum ekki síst hjá konunum þar sem þrír kylfingar skiptust á að hafa forystuna á síðustu holunum.

Haraldur Franklín Magnús og Keilismaðurinn Rúnar Arnórsson háðu einvígi um titilinn og voru báðir að spila frábært golf. Í lokin munaði aðeins einu höggi á þeim félögum, Haraldur lék á sjö höggum undir pari en Rúnar var á sex höggum undir pari.

Rúnar fékk fugl á þrettándu holunni og var í framhaldinu með eitt högg í forskot en allt snerist þetta síðan á sextándu holunni. Haraldur Franklín fékk fugl á henni og komst sjö höggum undir samanlagt en á sama tíma tapaði Rúnar höggi og var því kominn sex höggum undir par. Sá munur hélst síðan til loka og Haraldur fagnaði sigri með félögum sínum í GR sem flestir voru búnir að bíða lengi eftir þessari stund. GR átti líka manninn í þriðja sæti; Þórð Rafn Gissurarson. Haraldur Franklín Magnús er tvöfaldur meistari í ár því hann varð einnig Íslandsmeistari í holukeppni fyrr í sumar.

Búinn að ímynda sér þetta í 4 ár„Ég var búinn að ímynda mér það í svona fjögur ár að ég gæti unnið þetta," sagði Haraldur Franklín Magnús sigurreifur í viðtali við Sigurð Elvar Þórólfsson á Stöð 2 Sport skömmu eftir að hann fékk Íslandsbikarinn í hendurnar.

„Ég fékk vissulega engan skolla á hringnum en ég var heldur ekki að fá mikið af fuglum," sagði Haraldur Franklín sem átti möguleika á að fá fugla á bæði 13. og 14. holunni en tókst ekki. „Ég var ekkert smá svekktur að ná ekki fuglum þarna því þá var hann einu höggi á undan mér en ég náði honum síðan," sagði Haraldur Franklín.

„Ég er ógeðslega sáttur með þetta," sagði Íslandsmeistarinn sem er á leiðinni í nám til Bandaríkjanna. Hann eltir þar Íslandsmeistarann frá því í fyrra til Mississippi en það er farið að skapast hefð fyrir því að Íslandsmeistarinn í golfi gangi til liðs við golflið Mississippi State University. „Ég ætla að klára skólann fyrst en svo get ég farið að pæla eitthvað í atvinnumennskunni," sagði Haraldur.

Tilfinningin alveg jafngóð„Þetta er frábært og tilfinningin er alveg jafngóð og í fyrsta skiptið," sagði Valdís Þóra Jónsdóttir úr Leyni við Sigurð Elvar Þórólfsson á Stöð 2 Sport eftir að Íslandsmeistaratitilinn var í höfn í annað skiptið á ferlinum. Dramatíkin var mikil í kvennaflokki og um tíma leit út fyrir að umspil myndi ráða úrslitum.

Valdís Þóra háði þar rosalega keppni við Keiliskonurnar Önnu Sólveigu Snorradóttur og Tinnu Jóhannsdóttur sem voru á endanum einu höggi á eftir. Anna og Tinna voru báðar mjög nærri því að setja niður pútt á lokaholunni sem hefði tryggt þeim umspil á móti Valdísi Þóru. Anna vann síðan Tinnu í umspili um annað sætið.

„Ég var aldrei búin að missa trúna á þessu því þetta var bara eitt högg sem vantaði upp á. Ég á eftir að berja hausnum í vegg yfir hvað í andskotanum ég var að gera á fimmtándu og sextándu," sagði Valdís Þóra sem var nálægt því að kasta frá sér sigrinum með því að fá tvo skramba í röð. Hún kom hins vegar sterk til baka og tryggði sér sigurinn með því að leika síðustu tvær holurnar á pari.

„Það datt fram og til baka í lokin. Tinna tapaði höggi á 17. holunni og svo Anna á 18. holunni. Ég náði að redda parinu á báðum holum sem var fínt," sagði Valdís en hún var að keppa á sínu fyrsta móti í sumar.

„Ég var aðeins lengur úti í skóla í Bandaríkjunum en er búin að vera að æfa á fullu. Það er fínt að byrja sumarið hérna heima svona," sagði Valdís Þóra að lokum.