Nýtt X-Factor-teymi

Britney Spears og Demi Lovato eru nýir dómarar í X-Faktor í Bandaríkjunum. Söngkonurnar bætast í hóp með Simon Cowell og L.A. Reid þegar sjónvarpsþættirnir snúa aftur í haust.

Yfirdómarinn Simon Cowell hafði áður lofað því að hrista upp í X-Faktor eftir að áhorfstölur voru lægri en vonir stóðu til. „Þetta verður besta þáttaröð sem við höfum nokkru sinni búið til. Við byrjuðum mjög vel í fyrra en við ætlum að gefa í með tilkomu þessara nýju dómara," sagði hann.

Britney Spears hefur selt yfir hundrað milljónir platna um allan heim. „Þetta verður mjög gaman og líka öðruvísi en það sem ég hef áður gert. Ég er tilbúin til að finna réttu stjörnuna," sagði hún.

Disney-stjarnan Demi Lovato, sem er nítján ára, hefur gefið út þrjár plötur á ferli sínum. Hún hefur glímt við persónuleg vandamál, rétt eins og Spears, og fór í meðferð vegna átröskunar. „Ég er spennt fyrir því að vera fulltrúi minnar kynslóðar og er tilbúin að finna sigurvegarann," sagði hún.