Extreme Fishing á Íslandi

Enski leikarinn Robson Green var nýverið staddur hér á landi við tökur á sjónvarpsþættinum Extreme Fishing. Samkvæmt heimildum Fréttablaðsins stóðu tökurnar yfir í einn til tvo daga og fóru m.a. fram á Grundarfirði.

Upphaflega ætluðu Green og félagar að dvelja hér á landi í eina viku og gera heilan þátt um Ísland en ekkert varð af því. Í Extreme Fishing ferðast Green víða um heim, hittir sjómenn og kynnir sér marga af hættulegustu fiskum heimsins, þar á meðal hinn eitraða Puffer frá Japan. Green er kunnur á meðal íslenskra sjónvarpsáhorfenda sem sálfræðingurinn Tony Hill í þáttunum Wire in the Blood.