Franska Eurovision-lagið á flakki

Flytjandi franska framlagsins til Eurovision þetta árið, Anggun, notar lúmskar leiðir til að koma sér á framfæri fyrir keppnina í lok maí.

Hún ferðast nú um Evrópu og tekur upp dúett af lagi sínu Echo (You and I) með fólki frá hinum ýmsu löndum. Nú í byrjun apríl kom út nýjasta útgáfa lagsins, en hún var tekin upp með danska söngvaranum Niels Brinck og kallast Echo (Losing you and I). Brinck þessi keppti í Eurovision fyrir hönd Danmerkur árið 2009 með lagið Believe Again.

Anggun hefur einnig tekið lagið upp með ungverska söngvaranum Viktor Varga og gefið það út undir heitinu Visszhang (You and I). Næst á dagskrá er svo maltneska söngkonan Claudia Faniello, auk þess sem Anggun hefur lýst yfir áhuga á að taka lagið með rússneskum söngvara.

Hægt er að sjá tónlistarmyndbandið fyrir Echo (You and I) hér fyrir ofan.