Lögð inn vegna ofþreytu

Leikkonan Demi Moore var færð á spítala í byrjun vikunnar vegna ofþreytu en þetta staðfestir talsmaður Moore. „Vegna mikils stress í lífi sínu þessa stundina hefur Demi ákveðið að leita sér hjálpar og meðferðar við ofþreytu. Hún einbeitir sér nú að því að ná fullri heilsu með stuðningi fjölskyldu og vina," segir talsmaður leikkonunnar við US Magazine.

Ástæða heilsuleysis Moore er skilnaður hennar við eiginmann sinn til sex ára, Ashton Kutcher, en skilnaðurinn hefur tekið sinn toll af henni, meðal annars þurfti hún að draga sig úr næstu mynd sinni, Lovelace, til að einbeita sér að því að ná bata. Ástæða skilnaðarins er ekki kunn en Kutcher hefur ítrekað sést í fangi föngulegra kvenna síðan leiðir hjónanna skildi.