Dikta á National Geographic

„Það væri óskandi ef þetta vekur athygli á sveitinni en við höfum ekki orðið varir við neitt slíkt enn þá," segir Haukur Heiðar Hauksson, söngvari og gítarleikari hljómsveitarinnar Dikta.

Sjónvarpsstöðin National Geographic hóf nýverið sýningar á nýrri heimildarþáttaröð er nefnist Islands og fjallar um mannlíf og náttúru ólíkra eyja. Einn þáttanna fjallar um Ísland og var sá sýndur á þriðjudaginn var. Meðal þess sem fjallað var um var íslenskt menningarlíf og tóku þáttarstjórnendur viðtal við meðlimi hljómsveitarinnar Diktu vegna þessa.

Ár er síðan viðtalið var tekið við meðlimi sveitarinnar og kveðst söngvari hennar, Haukur Heiðar Hauksson, ekki muna nákvæmlega hvernig þetta kom til. „Við fengum símtal og vorum beðnir um viðtal en ég veit ekki af hverju við urðum fyrir valinu frekar en aðrir.

Þáttarstjórnandinn spurði okkur spurninga á ensku og við áttum fyrst að svara á íslensku en þýða svo svarið yfir á ensku. Við erum ekki sérstaklega vanir löngum sjónvarpsviðtölum, hvað þá á ensku, og manni vafðist stundum tunga um tönn, en þetta var gaman og fólkið hið viðkunnanlegasta," segir Haukur Heiðar.

Tökur á þáttaröðinni hófust á Íslandi og voru piltarnir því meðvitaðir um að þátturinn yrði ekki sýndur nærri strax. Þeir fengu þó senda mynddiska með þættinum til áhorfs og sýndu fjölskyldu og nánustu vinum.

Viðtalið telst nokkuð veglegt, saga sveitarinnar er meðal annars rakin og piltarnir sjást spila smell sinn Thank You. „Þáttarstjórnandinn hafði samband við okkur eftir á og bað um eldra efni með okkur, ég fann eina gamla mynd og sendi henni. Henni fannst víst merkilegt að þrátt fyrir að við værum orðnir fullorðnir menn með fjölskyldur og menntun værum við enn í sömu hljómsveit og þegar við vorum strákar."- sm