Stark viðurkennir mistök

Dómarar eru ekki vanir að tjá sig um einstaka dóma eða eigin frammistöðu í leikjum. Í ansi mörgum tilfellum mega þeir það einfaldlega ekki.

Þýski stórdómarinn Wolfgang Stark hlustar ekki á neitt slíkt. Hann hefur nú tjáð sig um umdeilt atvik í leik Dortmund og Wolfsburg um síðustu helgi.

Þá rak hann leikmann Dortmund af velli fyrir að verja boltann með hendi á línunni. Þá leiddi Dortmund 1-0 en tapaði að lokum 2-3 og er fyrir vikið nánast búið að missa af þýska meistaratitlinum.

Endursýningar í sjónvarpi sýndu aftur á móti að leikmaður Dortmund varði boltann alls ekki með hendinni.

"Ég biðst afsökunar á þessu. Þetta voru mistök hjá mér. Ég er búinn að skoða atvikið á myndbandi. Í rauntíma fannst mér vera augljóst að boltinn hefði farið í hendi leikmannsins. Ég gat því ekki annað en dæmt víti og rekið leikmanninn af velli. Ég gerði aftur á móti mistök," sagði Stark.

Hægt er að sjá myndband af þessu atviki hér að ofan.