Flestir farsímaeigendur eiga Nokia

Langflestir Íslendinga sem eiga farsíma eru með Nokia síma, eða um 43% þeirra sem eiga síma.

Hlutfallið er hins vegar mismunandi eftir því hvort um er að ræða hefðbundna síma eða snjallsíma, eftir því sem fram kemur í könnun MMR. Þannig voru 74,0% þeirra sem nota hefðbundin símtæki sem sögðust mest nota Nokia síma. Á móti voru aðeins 17,1% þeirra sem sögðust vera með snjallsíma með símtæki frá Nokia.

Flestir snjallsímaeigendur eiga hins vegar síma frá Samsung eða tæp 34%, en um 22% eiga snjallsíma frá Apple. Um 17% eiga síðan snjallsíma frá Nokia, eins og áður segir.

Svona var könnunin gerð:

Úrtak: Einstaklingar á aldrinum 18-67 ára valdir handahófskennt úr hópi álitsgjafa MMR

Könnunaraðferð: Spurningavagn MMR

Svarfjöldi: 829 einstaklingar á aldrinum 18-67 ára

Dagsetning framkvæmdar: 9.-12. október 2012.