Sakaður um að hafa beitt starfsmenn Glitnis þrýstingi í Aurum-málinu

Með sex milljarða lánveitingu frá Glitni banka til að fjármagna kaup FS38 á 25,7% hlut Fons í Aurum Holding var áhættunni af kaupunum velt yfir á Glitni banka. Þetta kemur fram í ákæru sem sérstakur saksóknari gaf út fyrir helgi í Aurum málinu. Lárus Welding, fyrrverandi forstjóri Glitnis, og Magnús Arnar Arngrímsson, þáverandi framkvæmdastjóri fyrirtækjasviðs Glitnis banka, eru ákærðir fyrir umboðssvik vegna lánsins.

Í ákærunni kemur fram að lánið hafi ekki fengist endurgreitt og telja verði umrædda fjármuni bankanum að stærstum hluta glataða þar sem hlutur FS38 ehf. í Aurum Holdings hafi orðið verðlaus á árinu 2009 við það að lánadrottnar félagsins tóku það yfir gegn niðurfærslu alls hlutafélagsins í eitt sterlingspund. Þá hafi skiptum á þrotabúi FS38 verið lokið án þess að nokkuð kæmi upp í lýstar kröfur auk þess sem bú Fons hafi verið tekið til gjaldþrotaskipta.

Jón Ásgeir Jóhannesson er ákærður fyrir hlutdeild í umboðssvikum Lárusar og Magnúsar Arnars, en til vara fyrir hylmingu og til þrautavara fyrir peningaþvætti, með því að hafa, í krafti áhrifa sinna í Glitni beitt Lárus og Bjarna fortölum og þrýstingi og hvatt til þess persónulega og með liðsinni Jóns Sigurðssonar, varaformanns stjórnar Glitnis banka, og Gunnars Sigurðssonar, forstjóra Baugs, að Lárus og Magnús samþykktu að veita lánið.

Í ákæru, sem fjölmiðlar fengu senda í dag, segir að Jón Ásgeir hafi ráðið yfir 40% af hlutafé bankans í gegnum félög sem hann, fjölskylda hans og viðskiptafélagar áttu meirihluta í og stjórnuðu. Honum hafi ekki geta dulist að með lánveitingunni væru Lárus og Magnús Arnar að misnota aðstöðu sína og valda bankanum verulegri fjártjónshættu. Jón Ásgeir hafi fengið um milljarð af lánsfjárhæðinni inn á reikning sinn sem hann hafi nýtt til að greiða rúmlega 700 milljóna ótryggða yfirdráttaskuld sína hjá Glitni. Þannig hafi Jón Ásgeir fengið hlut af ávinningi af brotinu og notið hagnaðarins.

Bjarni Jóhannesson, þáverandi viðskiptastjóri hjá Glitni er ákærður fyrir hlutdeild í umboðssvikunum með því að hafa vegna þrýstings frá Jóni Ásgieiri og með samþykki Lárusar, undirbúið lánveitinguna.

Þegar Vísir leitaði viðbragða hjá Jóni Ásgeiri eftir birtingu ákærunnar í dag, sagði hann að sín sjónarmið hefðu komið fram í Fréttablaðinu á föstudag. Hann hefði ekkert um málið að segja umfram það.