Kobe skorar á Pau Gasol

Það gengur ekki vel hjá Pau Gasol, leikmanni Lakers, þessa dagana. Í nótt mátti hann sætta sig við að horfa á lok leiksins gegn Orlando á bekknum. Var það í annað sinn í fimm leikjum sem það gerist.

Gasol var tekinn af velli er sex mínútur voru eftir. Þá var Lakers einu stigi yfir, 84-83, en Orlando vann leikinn 113-103. Gasol skoraði 11 stig og hitti úr fjórum af ellefu skotum sínum.

Kobe Bryant, liðsfélagi Gasol, sendi félaga sínum áskorun eftir leikinn.

"Hann verður að fara í stórustrákabuxurnar sínar. Hann verður að aðlagast en ekki kvarta. Hann ræður þessu alveg sjálfur," sagði Kobe og Gasol hafði þetta að segja.

"Ég verð ekki pirraður. Ég vil spila og þetta er vont fyrir mig sem leikmann en ég má ekki láta þessa stöðu trufla mig."