Kristján tók silfrið á opna finnska mótinu

Kristján Jónsson úr Júdófélagi Reykjavíkur, tryggði sér í morgun silfurverðlaunin í -81 kílóa flokki á opna finnska meistaramótinu í júdó. Kristján tapaði fyrir heimamanni í úrslitaglímunni.

Kristján mætti Laamanen Aatu í fyrstu viðureign suinni. Kristján leiddi þá glímu og var yfir þegar örfáar sekúndur voru eftir en þá náði Aatu að jafna og tryggja sér framlengingu þar sem hann vann á wazaari (7 stig).

Kristján vann síðan Sulander Petteri örugglega í næstu viðureign en hann tók hann á ippon (10 stig) eftir rúma mínútu. Petteri hafði áður unnið Aatu á yuko (5 stig) svo allir voru með einn vinning í riðlinum en Kristján var með flest tæknistigin svo hann vann riðilinn og komst í undanúrslitin.

Kristján mætti Vitaliy Inyushkin í undanúrslitunum og vann hann á yuko (5 stig) að loknum fullum glímutíma og var því kominn í úrslit.

Í úrslitinum mætti Kristán finnska júdómanninum Laamanen Eetu og var það hörkuviðureign. Eetu vann að lokum á ippon þegar Kristján sótti í bragð (harai goshi) og Eetu komst í mótbragð og skellti Kristjáni á bakið.

Viktori Bjarnasyni gekk ekki eins vel í -73kg flokki en hann tapaði fyrir Joonatan Gröndahl sem síðan tapaði næstu viðureign. Það var því engin uppreisnarglíma hjá Viktori og keppni lokið hjá honum eftir eina glímu.