Ferrari-liðið sannfært um ágæti Massa og framlengir samninginn

Brasilíski Formúlu 1-ökuþórinn Felipe Massa mun aka hjá Ferrari áfram á næsta ári. Þetta staðfesti liðið í gær. Sæti Massa virtist falt hverjum sem er fyrr í sumar þegar Massa stóð sig hörmulega.

Massa hefur ekið hjá Ferrari síðan árið 2006 eftir að hafa staðið sig vel hjá Sauber frá 2003. Þá tók hann við sem liðsfélagi Michael Schumacher af Rubens Barrichello. Massa var svo í titilbaráttu við Lewis Hamilton árið 2008, sem hann hélt að hann hefði unnið í um það bil tíu sekúntur eða þangað til Hamilton vann sæti í síðustu beygju í síðasta móti.

Í japanska kappakstrinum náði Massa verðlaunasæti í fyrsta sinn síðan í kóreska kappakstrinum árið 2010. Það er til marks um hversu erfitt þetta tímabil hefur verið og það í fyrra.

Stefano Domenicali, liðstjóri Ferrari, segir liðið hafa fullt traust á Massa til að sinna starfi annars ökuþórs liðsins á eftir Fernando Alonso. Það hefur lengi verið stefna Ferrari að velja annan ökuþórinn fram yfir hinn.

Ökumannsmarkaðurinn iðar af lífi þessa dagana. Nico Hulkenberg er sagður á leið frá Force India til Sauber, Jules Bianchi gæti fyllt lausa sætið hjá Force India. Þá er talið víst að Bruno Senna fái ekki áfram að aka hjá Williams og að finnski tilraunaökuþórinn Valtteri Bottas fái tækifærið.

Bæði Bottas og Bianchi hafa staðið sig ógnarvel á æfingum í ár og í fyrra. Þeir eiga því keppnissæti víst þó það verði kannski ekki hjá eins stórum liðum og Williams og Force India.