Norðurá: Yfirlýsing frá SVFR

Stjórn Stangaveiðifélags Reykjavíkur hefur birt yfirlýsingu um samningsslitin við Veiðifélag Norðurár á vefsíðunni svfr.is.

Yfirlýsing SVFR:

„Í kjölfar veiðibrestsins í sumar hefur stjórn SVFR lagt allt kapp á að tryggja að ákveðinn stöðugleika í verði veiðileyfa fyrir næsta sumar. Við teljum engar forsendur vera fyrir verulegum hækkunum á verðum veiðileyfa og höfum því rætt við flesta okkar viðsemjendur um að koma til móts við okkur, helst með óbreytt verð á milli ára.

Síðastliðið vor var samið við Veiðifélag Norðurár um leigu næstu tveggja ára. Eftir aflabrestinn í sumar óskuðum við eftir breytingum á leiguverði við Veiðifélagið. Því miður þá náðum við einfaldlega ekki saman um verð sem báðir aðilar gátu sætt sig við. Því hafa veiðiréttareigendur við Norðurá og Stangaveiðifélag Reykjavíkur ákveðið að sá tveggja ára samningur sem undirritaður var í vor, gildi aðeins fyrir veiðisumarið 2013.

Við höfum átt farsælt 66 ára samstarf við Norðurárbændur og þó við vitum ekki hvert framhaldið verður, þá er alveg ljóst að við stefnum ótrauð á að endurnýja samstarfið um ánna á einhvern máta sem báðir aðilar geta unað við!"

trausti@frettabladid.is