TV2 í Noregi: Steinþór slóst á æfingu

Samkvæmt frétt vefmiðils norsku sjónvarpsstöðvarinnar TV2 mun Steinþór Freyr Þorsteinsson hafa slegist við liðsfélaga sinn á æfingu Sandnes Ulf í dag.

Steinþór Freyr á að hafa veist að Marius Helle, liðsfélaga sínum, með þeim afleiðingum að ganga þurfti á milli þeirra.

Ástæðan er sögð vera sú að Steinþór hafi reiðst vegna svæsnar tæklingar Helle á æfingunni.

Haft er eftir Asle Andersen, þjálfara liðsins, að svo lengi sem að enginn skaðist geri ekkert til þó svo að leikmenn láti aðeins í sér heyra á æfingum.

„Það var mikil keyrsla á æfingunni og ég kann að meta að leikmenn gefi allt sitt í æfingarnar. Við þurfum leimkenn sem eru tilbúnir til þess," sagði Andersen.

Sandnes Ulf féll niður í fallsæti í norsku úrvalsdeildinni um helgina er liðið tapaði fyrir Haugesund, 3-2.