Angelina Jolie keypti Beckham nærbuxur fyrir Pitt

Stórleikkonan Angelina Jolie gerði stórkaup í H&M verslun í Surrey á dögunum. Á meðal þess sem hún keypti voru sérstakar David Beckham nærbuxur sem hún keypti fyrir eiginmann sinn, leikarann Brad Pitt.

Slúðurblaðið The Sun segir að Jolie komi oft við í H&M eftir að hún flutti til Surrey, en áður en hún leit þar við í síðustu viku lét hún loka versluninni.

Brad Pitt og Angelina Jolie hafa verið í Bretlandi að undanförnu þar sem Jolie vinnur að myndinni Maleficent. Vivienne, dóttir þeirra, fer einnig með lítið hlutverk í myndinni.