Kristján Þór á tveimur höggum undir pari eftir fyrstu 18 holurnar

Keilismaðurinn Kristján Þór Einarsson er með tveggja högga forystu eftir fyrsta hringinn á Síma-mótinu í golfi sem stendur nú yfir á Grafarholtsvelli í Reykjavík en þetta er lokastigamótið á Eimskipsmótaröðinni. Leiknar verða 54 holur í mótinu, þar af 36 holur í dag, laugardag. Strákarnir eru því á leiðinni út aftur á eftir.

Kristján Þór er að spila mjög vel en hann lék fyrstu 18 holurnar á 69 höggum eða tveimur höggum undir pari. Einar Haukur Óskarsson úr Keili er í öðru sæti á parinu og í 3. sætinu er Magnús Lárusson úr Kili á einu höggi yfir pari.

Kristján Þór fékk fimm fugla á hringnum og einn af þremur skollum hans var á 18. holunni. Hann tapaði líka höggi á 2. og 11. holunni en annars var hann í feiknaformi.

Haraldur Franklín Magnús úr GR, tvöfaldur Íslandsmeistari á þessu tímabili, er í efsta sæti á stigalista karla með 5266,43 stig. Haraldur er ekki með í mótinu því hann hélt nýverið til náms í Bandaríkjunum.

Hlynur Geir Hjartarson, úr GOS, er með pálmann í höndunum í karlaflokki með 5157,50 stig. Andri Þór Björnsson úr GR er þriðji en hann verður ekki með um helgina. Þórður Rafn Gissurarson úr GR kemur í 4. sæti og hann ásamt Rúnari Arnórssyni úr GK eru þeir einu sem geta náð Hlyni að stigum.

Staðan eftir 18 holur hjá körlunum:

1. Kristján Þór Einarsson, GK -2

2. Einar Haukur Óskarsson, GK Par

3. Magnús Lárusson, GKJ +1

4. Þórður Rafn Gissurarson, GR +2

4. Arnar Snær Hákonarson GR +2

6. Hlynur Geir Hjartarson, GOS +4

6. Kjartan Dór Kjartansson, GKG +4

6. Örvar Samúelsson, GA +4

6. Gísli Sveinbergsson, GK +4

10. Tryggvi Pétursson, GR +5