Erfiðar aðstæður á Strandarvelli | Axel byrjar með látum

Það blés hraustlega á kylfingina sem hófu leik snemma í morgun á Strandarvelli á Hellu þegar annar keppnisdagur af alls fjórum hófst á Íslandsmótinu í höggleik. Síðustu ráshóparnir í karlaflokknum fara ekki út fyrr en kl. 16 í dag en nokkrir af þeim sem voru í efstu sætunum eftir fyrsta daginn hafa nú þegar lokið leik. Haraldur Franklín Magnús úr GR erá meðal þeirra en hann lék á 74 höggum í dag eða +4 en hann var með næst besta skor gærdagsins 67 högg eða -3.

Haraldur Franklín náði að bjarga sér fyrir horn með því að fá þrjá fugla á fjórum síðustu holum dagsins en hann hafði ekki leikið vel fram að því. Samtals er Haraldur á +1 og er hann efstur af þeim sem hafa lokið leik í dag.

Birgir Leifur Hafþórsson úr GKG lék á 74 höggum í dag eða 4 höggum yfir pari og samtals er hann á +3 eftir að hafa leikið á 69 höggum í gær.

Ólafur Björn Loftsson úr Nesklúbbnum lék á 71 höggi í dag en hann er einnig á samtals +3, eftir að hafa leikið á 72 höggum í gær.

Axel Bóasson, Íslandsmeistarinn frá því í fyrra, byrjaði með miklum látum í dag og hann er nú þegar búinn að fá 6 fugla á fyrstu 12 holunum. Hann fékk skramba á 6. braut, +2, og skolla á 11. Samtals er hann á +1 eftir að hafa leikið á 74 höggum í gær.