Olic fer til Wolfsburg í sumar

Markamaskínan Ivica Olic er á förum frá FC Bayern í sumar en mun spila áfram í Þýskalandi því hann er búinn að semja við Wolfsburg til tveggja ára.

Þessi 32 ára gamli Króati kom til Bayern frá Hamburg árið 2009 og staðið sig vel. Hann hefur þó spilað takmarkað í vetur og fannst því rétt að færa sig um set.

"Það er rétt að ég er búinn að semja við Wolfsburg. Ég er mjög ánægður með þetta næsta skref hjá mér. Það var gengið frá þessu í góðu á milli mín og Bayern," sagði Olic.

Lazio hafði einnig áhuga á framherjanum en hann vildi ekki yfirgefa Þýskaland.