Lið og ökumenn: Sauber, Toro Rosso og Williams

Keppnistímabilið 2012 hefst á sunnudaginn þegar ástralski kappaksturinn verður ræstur í Melbourne. Það er langt síðan búist var við jafn jafnri og harðri keppni í Formúlú 1. Vísir hitar upp fyrir fyrsta mótið í vikunni og byrjar á kynningum á liðum og ökumönnum.

Alls munu tólf lið ræsa í Ástralíu. Þau eru Red Bull, McLaren, Ferrari, Mercedes, Lotus, Force India, Sauber, Torro Rosso, Williams, Caterham, HRT og Marussia. Tímabilið spannar 20 mót og hafa þau aldrei verið fleiri á einu tímabili.

Viku eftir ástralska kappaksturinn er flogið til Malasíu og ekið á Sepang brautinni.

Smellið á myndirnar til að sjá þær stærri.

Sauber F1 Team

Hjá Sauber aka sömu ökumenn og í fyrra, þeir Kamui Kobayashi frá Japan og Mexíkóinn Sergio Perez. Báðir geta verið eldfljótir þegar sá gállinn er á þeim. Liðið var stofnað í Sviss af Peter Sauber árið 1993 og hefur ávalt verið fyrir miðja deild eða þar rétt fyrir ofan. Það er útlit fyrir að þannig verði það aftur í ár.

Það er liðið ár síðan Perez þreytti frumraun sína í Formúlu 1. Hann kom öllum á óvart og tók aðeins eitt þjónustuhlé í ástralska kappakstrinum og fullnýtti nýju Pirelli dekkin. Hann endaði sjöundi í mótinu. Þar kom hann sér í hóp með Fernando Alonso og Mark Webber sem hófu feril sinn í F1 með því að stimpla sig rækilega inn í Ástralíu.

Scuderia Toro Rosso

Litli ítalski bróðir Red Bull liðsins er Toro Rosso. Sagt er að liðið þjóni sem uppeldisstöð fyrir stóra liðið á Bretlandi. Þeir vona það örugglega ökumenn liðsins, þeir Daniel Ricciardo og Jean-Eric Vergne, báðir kornungir og tilbúnir að láta til sín taka. Búast má við mjög harðri baráttu á milli þeirra félaga enda mikið í húfi. Því hefur verið haldið fram að árið í ár sé lokapróf fyrir þá og hlutskarpari aðilinn fái sæti Mark Webbers hjá Red Bull.

Sebastian Vettel ók fyrir Toro Rosso árið 2008 og er sá síðasti til að koma upp úr litla liðinu. Það ár sigraði hann ítalska kappaksturinn með glæsibrag af ráspól. Það verður erfitt verkefni fyrir Daniel og Jean-Eric að jafna þann árangur því Toro Rosso hefur haft hægt um sig á undirbúningstímabilinu, þó þeir þurfi raunar ekki að hafa miklar áhyggjur; Red Bull sér þeim fyrir nýjungum.

Williams F1

Síðan BMW hætti að sjá Williams liðinu fyrir vélum hefur það verið í frjálsu falli. Williams er eitt sigursælasta lið Formúlu 1 en er að ganga í gegnum erfiðasta skeið tilvistar sinnar. Það eru vonandi bjartari tímar framundan því nú sér Renault liðinu fyrir vélum. Síðast þegar fyrirtækin tvö störfuðu saman vann Williams heimsmeistaratitil bílasmiða fimm sinnum. Nú er hins vegar svo komið að liðið þarf að velja sér ökumenn með það fyrir augum hversu mikla peninga hann getur skaffað liðinu.

Í ár aka þeir Pastor Maldonado og Bruno Senna fyrir Williams. Maldonado ók við hlið Rubens Barrichello í fyrra með ágætis árangri. Bruno Senna er frændi Ayrton Senna sem lést í Williams bíl í hræðilegu slysi fyrir tæpum 18 árum. Mikil pressa hvílir því á herðum Bruno fyrir tímabilið, sérstaklega eftir ágætis spretti í Lotus-Renault bíl í fyrra.