Real Madrid áfram án mikilla vandræða - Ronaldo með tvö í 4-1 sigri á CSKA

Real Madrid tryggði sér sæti í átta liða úrslitum Meistaradeildarinnar með 4-1 sigri á CSKA Moskvu á Santiago Bernabéu í kvöld. Liðin gerðu 1-1 jafntefli í fyrri leiknum í Moskvu og Real vann því samanlagt 5-2. Cristiano Ronaldo skoraði tvö mörk í leiknum en hin mörkin gerðu þeir Gonzalo Higuaín og Karim Benzema.

Gonzalo Higuaín kom Real í 1-0 á 26. mínútu eftir fyrirgjöf Sami Khedira og sendingu frá Kaka. Real var því komin í fín mál eftir fyrri hálfleikinn.

Cristiano Ronaldo bætti við öðru marki á 55. mínútu með þrumuskoti af 35 metra færi sem skoppaði í grasinu fyrir framan markvörð CSKA, Sergei Chepchugov.

Karim Benzema kom inn á sem varamaður fyrir Higuaín á 69. mínútu og var búinn að skora mínútu síðar. Mezut Ozil átti stungusendingu inn á Frakkann sem skoraði í annarri tilraun.

Zoran Tosic minnkaði muninn í 3-1 með marki á 77. mínútu með frábæru skoti af löngu færi. CSKA ógnaði ekki marki Real mikið eftir það og Cristiano Ronaldo innsiglaði síðan sigurinn á fjórðu mínútu í uppbótartíma eftir sendingu frá Karim Benzema.