Kobe Bryant: Það á að reka alla þá sem misstu af Jeremy Lin

Kobe Bryant, aðalstjarna NBA liðsins Los Angeles Lakers, hefur hrifist af tilþrifum Jeremy Lin hjá New York Knicks. Lin skoraði 38 stig fyrir New York gegn Lakers á dögunum en innkoma hans í NBA deildina hefur vakið gríðarlega athygli. Kobe Bryant telur að forráðamenn tveggja NBA liða ættu að reka alla þá sem sáu ekki hvaða hæfileika Lin býr yfir.

Leikstjórnandinn Lin var látinn taka pokann sinn hjá Houston Rockets og Golden State Warriors áður en New York Knicks gerði 10 daga samning við hann.

„Það sem ég skil ekki er hvernig menn misstu af honum. Ef ég ætti þessi lið þá væri búið að reka þá alla. Ég hef heyrt að Lin hafi komið á óvart en ég trúi því ekki. Þú getur ekki leikið eins vel og hann hefur gert án þess að aðrir hafi tekið eftir því áður. Hæfileikarnir og getan er til staðar en það voru margir sem sáu það ekki. Það væru nokkur höfuð fokin ef ég fengi að ráða," sagði Kobe Bryant á dögunum við bandaríska dagblaðið USA Today.