Myndir náðust af örgjörva iPad 3

Nú styttist í að Apple kynni næstu kynslóð af iPad spjaldtölvunum vinsælu. Margt er á huldu um spjaldtölvuna en nú hafa upplýsingar tekið að berast frá framleiðanda iPad í Kína.

Starfsmaður í framleiðsluverksmiðju iPad í Kína birti þessa mynd af móðurborði iPad 3.

Svo virðist sem að myndin sé ósvikin og hafa tæknisérfræðingar víða um heim rýnt í hana frá því að hún var birt um helgina.

Allt bendir til að spjaldtölvan verði knúin af endurbættri útgáfu af A5 örgjörvanum sem var í iPad 2. Örgjörvinn kallast A5X og er sagður vera margfalt hraðari en forveri sinn.

Skjákort iPad 3 mun njóta góðs af þessum öfluga örgjörva og er talið að upplausn snertiskjásins verði 2048 x 1536. Skjárinn mun því styðja við myndefni og tölvuleiki í þrívídd. Einnig þykir líklegt að myndavél spjaldtölvunnar verði 8 megapixlar.

Apple hefur ekkert gefið upp um hvenær iPad 3 verður kynntur. Þó er orðrómur um að Tim Cook, forstjóri Apple, ætli að stíga á stokk í San Francisco 2. mars næstkomandi og kynna spjaldtölvuna.