Hafnarfjarðarslagur í bikarnum

Haukar og FH drógust saman í undanúrslit Eimskipsbikarkeppni karla í dag og því von á miklum Hafnarfjarðarslag enn og aftur.

HK og Fram munu eigast við í hinni undanúrslitaviðureigninni karlamegin en þessi lið eru einmitt í efstu fjórum sætum N1-deildar karla.

Haukar eru á toppnum með 20 stig en FH og HK koma næst með fimmtán stig hvort. Fram er svo í fjórða sætinu með fjórtán stig.

Það var einnig dregið í kvennaflokki. Valur, sem sló út bikarmeistara Fram í gær, fékk heimaleik gegn Stjörnunni. ÍBV fékk einnig heimaleik og mætir FH.

Undanúrslitin í karlaflokki fara fram þann 13. febrúar næstkomandi en 8. febrúar í kvennaflokki.

Úrslitaleikirnir fara svo fram í Laugardalshöllinni laugardaginn 25. febrúar.

Undanúrslit karla:

Haukar - FH

HK - Fram

Undanúrslit kvenna:

Valur - Stjarnan

ÍBV - FH