16 ára bið GusGus eftir gullplötu á enda

„Okkur var tilkynnt það um daginn að við værum að fá okkar fyrstu gullplötu. Seint koma sumir,“ segir Stephan Stephensen, eða President Bongo, liðsmaður GusGus.

Þrátt fyrir að hafa verið starfandi síðan 1995 og selt plötur sínar í yfir hálfri milljón eintaka úti í heimi samanlagt fékk hljómsveitin GusGus sína fyrstu gullplötu hérlendis afhenta í gær. „Þetta er rosalega gaman,“ segir Stephan. „Við höfum selt yfir 200 þúsund af einni plötu úti en hérna heima er kúrfan öfug.“

Aðspurður segist Stephan vera mjög ánægður með nýju plötuna Arabian Horse, sem hefur selst í yfir fimm þúsund eintökum hérna heima og var nýlega tilnefnd til Norrænu tónlistarverðlaunanna. „Það er mjög skemmtilegt hvernig þetta small allt saman, hverjum sem það er nú að þakka.“

Hljómsveitin heldur tónleika á Nasa á laugardagskvöld. Högni Egilsson stígur á svið með sveitinni, en hann er nýkominn til landsins eftir að hafa samið tónlist fyrir leikritið Hróa hött í London síðustu vikur.

„Það er gott að sjá strákinn aftur. Það er æðislegt að vera með svona ungan fola í bandinu.“ Húsið verður opnað kl. 21 og mun DJ Margeir spila í einn og hálfan tíma. Stundvíslega kl. 22.30 stígur GusGus á svið og lofar Stephan hörkustemningu. „Við erum funheit og vel smurð.“- fb