Foreldrar Britney stjórna lífi hennar algerlega

Þrátt fyrir að Britney Spears hafi þénað í kringum þrjátíu milljónir dollara á síðasta ári sér hún varla dollara af því. Allir peningarnir renna til foreldra hennar sem enn þann dag í dag fylgjast með hverju skrefi dóttur sinnar.

Nicole Lampert, blaðamaður Daily Mail, skrifar ítarlega úttekt á högum poppprinsessunnar Britney Spears í vefútgáfu blaðsins. Lampert var viðstödd sérstakt hóf sem haldið var til heiðurs Spears en hún er á tónleikaferðalagi um Bretland. Gestirnir voru að mestum hluta D-stjörnur, blaðamenn og fjármálafurstar.

Britney Spears var á staðnum með freðið bros, umkringd lögfræðingum og lífvörðum. "Hún var þarna eins og dýr í búri enda manneskjan sem allir vildu sjá," skrifar Lampert.

Tónleikaferðalagið, sem nefnist Femme Fatale, hefur verið hálfmislukkað. Gagnrýnendur á Írlandi segja Spears taktlausa og reynt sé að fela það með allskyns farartækjum sem þeyta henni um sviðið. Aðrir nefna að krafturinn í augum hennar sé horfinn og hún þykist syngja nánast öll lögin. Hér áður fyrr gerði hún það eingöngu ef dansarnir voru líkamlega erfiðir, en slík átök heyra sögunni til.

Kannski er því ekkert skrýtið að Britney, sem varla mátti hnerra án þess að það rataði í blöðin, skuli ganga jafnilla að selja miða og raun ber vitni; það er til nóg af lausum sætum.

Það eru þrjú ár síðan Spears fékk taugaáfall, hún missti forræðið yfir sonum sínum tveimur og myndin af henni, bjargarlausri í sjúkrabíl, var allt að því óhugnanleg; konan sem átti allt hafði tapað áttum.

En nú er árið 2011, nýjasta platan hennar fór beint á toppinn á Billboard og á síðasta ári þénaði hún yfir þrjátíu milljónir dollara eða rúma þrjá milljarða íslenskra króna. Samt sem áður eru það foreldrar hennar, James og Lynne Spears, sem passa upp á hverja krónu. Og það er ekkert skrýtið við fyrstu sýn, fjöldi málsókna bíður hennar, kærur fyrir kynferðislegt áreiti, samningsrof og svo mætti lengi telja. Fyrir skömmu var málskostnaður hennar lagður fyrir dómara, hann reyndist vera 900 þúsund dollarar eða hundrað milljónir íslenskra króna.

"Ég sé ekki að þessum afskiptum eigi eftir að ljúka, hún getur ekki stjórnað sjálfri sér," hefur Daily Mail eftir George Rush, blaðamanni í skemmtanabransanum.

Foreldrarnir virðast telja að Spears sé of viðkvæm til að sjá um sitt eigið líf, þó ekki nógu viðkvæm til að koma fram og syngja fyrir þúsundir aðdáenda sinna, nánast á hverju kvöldi.

Samkvæmt Daily Mail hafa foreldrarnir ekki bara yfirumsjón með peningunum heldur líka lífi hennar almennt. Hún var á sínum tíma svipt sjálfræði og hefur ekki fengið það aftur. Hún má til að mynda ekki fara á salerni án fylgdar og foreldrarnir völdu kærasta hennar, Jason Trawick. Sá var umboðsmaður Britney rétt áður en ferill hennar fór í ræsið og hefur háleitar hugmyndir um unnustu sína samkvæmt heimildum blaðsins.

"Hann telur hana vel geta náð fyrri stöðu og þénað tvær milljónir dollara á dag, bara ef hún heldur sig á mottunni og réttu megin við strikið." Þangað til reynir Britney að gera það sem hún getur best, syngja og dansa, og endurheimta stöðu sína sem poppprinsessan. freyrgigja@frettabladid.is