Baltasar semur um Wahlberg-mynd

„Þetta hafðist og nú fer undirbúningur bara á fullt,“ segir Baltasar Kormákur kvikmyndaleikstjóri.

Samningar hafa náðst um að hann leikstýri spennumyndinni 2 Guns með Mark Wahlberg í aðalhlutverki. Eins og kom fram í fjölmiðlum fyrir skemmstu var Baltasar í viðræðum um að leikstýra tveimur verkefnum í Hollywood, annars vegar 2 Guns og hins vegar fjallamyndinni Everest.

Samkvæmt vefmiðlum í Bandaríkjunum verður þetta engin smámynd, talið er að kostnaðurinn verði í kringum 60 til 90 milljónir dollara eða sex til tíu milljarðar íslenskra króna eða næstum helmingi dýrari en Contraband, fyrsta alvöru Hollywood-mynd Baltasars. „Það er gert ráð fyrir því að tökur hefjist í mars á næsta ári.“

Verið er að ræða við aðra stórstjörnu um að leika í myndinni en Vince Vaughn, gamanleikarinn góðkunni, hefur verið orðaður við hana í dágóðan tíma. Ekki er þó líklegt að hann verði fenginn til verksins.

Að sögn leikstjórans er horft til Nýju-Mexíkó sem aðaltökustaðar og standa tökur væntanlega yfir í rúma þrjá mánuði. „Þetta er hálft ár sem fer í þetta verkefni þannig að maður þarf að finna hús, helst með sundlaug,“ grínast Baltasar með. 2 Guns er byggð á myndasögu eftir Steven Grant en það er handritshöfundurinn Blake Masters sem mun aðlaga söguna að hvíta tjaldinu. Meðal framleiðenda er Marc Platt en hann á meðal annars heiðurinn af kvikmyndunum Drive og Scott Pilgrim vs. the World. - fgg