Johnny Depp snýr aftur

Johnny Depp hefur aldrei farið leynt með þá ósk sína að hann fái hlutverk í kvikmyndaútfærslu sjónvarpsþáttanna 21 Jump Street. Margir hafa haldið því fram að hlutverk Depps yrði hálfgert feluhlutverk en orðrómur um að leikarinn verði í stórri rullu hefur fengið byr undir báða vængi að undanförnu.

21 Jump Street voru þeir þættir sem gerðu Depp að stjörnu í Bandaríkjunum og leikarinn vill mjög gjarnan launa þeim greiðann. Jack Johnson, sem leikur eitt aðalhlutverkanna í myndinni, viðurkennir að mikil leynd eigi að hvíla yfir þætti Depps.

„En ég get þó lofað því að þetta er meira en bara eitt andartak,“ sagði hann í samtali við sjónvarpsstöðina E!. Depp hefur hins vegar sjálfur sagt að aðdáendur hans gætu átt erfitt með að þekkja hann í hlutverkinu.