Brostinn strengur frá Lay Low

Þriðja sólóplata Lovísu Elísabetar Sigrúnardóttir, betur þekkt sem Lay Low, hefur fengið nafnið Brostinn strengur.

Eins og Fréttablaðið hefur greint frá syngur hún eigin lög við ljóð íslenskra kvenskálda, meðal annars Vilborgar Dagbjartsdóttur, Margrétar Jónsdóttur, Huldu og Hugrúnu. Eitt ljóðið heitir einmitt Brostinn strengur og er eftir þá síðastnefndu.

Aðspurð segir hún að upptökurnar á plötunni hafi gengið mjög vel en aðeins frágangurinn er eftir. „Það var alveg hellingur af fallegum ljóðum sem ég rakst á. Ég er með fullt af lögum sem náðu ekki að komast á þessa plötu og ég er ekki frá því að ég þurfi að gera fleiri plötur í þessu flæði til að ná yfir þetta allt,“ segir Lovísa. „Lögin eru mjög ólík, frá því að vera algjör rólegheit yfir í þokkalega mikinn æsing. Ég vona að sem flestir geti fundið eitthvað við sitt hæfi. Ég er allavega mjög ánægð með útkomuna.“

Mestöll platan var tekin upp á segulband til að halda í gamla stílinn. „Þetta var svolítið öðruvísi ferli en maður er búinn að venja sig á þegar allt er unnið í tölvum. Magnús Öder sem vann plötuna með mér er mikill hljóð- og analog-grúskari, þannig að hann fékk nóg að gera í þeim efnum. Ég stóð til hliðar og klóraði mér í hausnum,“ segir hún.

Lay Low stefnir á útgáfutónleika á Akureyri 21. október og í Reykjavík 3. nóvember. „Ég hlakka mikið til. Ég held að þetta verði skemmtilegt tónleikaprógram.“ - fb