Vinir Sjonna komast ekki í partí

„Það eru allir mjög uppteknir,“ segir Jónatan Garðarsson, fararstjóri íslenska Eurovision-hópsins.

Vinir Sjonna hafa þurft að afboða komu sína í tvö erlend Eurovision-partí vegna annríkis. Fyrra partíið var haldið í London á sunnudagskvöld þar sem hin ísraelska Dana International var á meðal gesta og hið síðara verður í Hollandi næstkomandi sunnudag. Eurobandið og Jóhanna Guðrún sungu í partíinu í London á sínum tíma en Hera Björk varð að afboða komu sína í fyrra vegna eldgossins í Eyjafjallajökli.

„Matti er að frumsýna Hárið, Pálmi er að undirbúa sýningu í Borgarleikhúsinu, Gunni er í námi á Bifröst, Viggi er að klára plötu og Þórunn var í Rússlandi með Vesturporti,“ segir Jónatan. „Það er eðlilegt að fólk hafi ekki tíma og það þýðir ekkert að senda bara einn.“

Aðspurður hvort þetta dragi ekki úr möguleikum íslenska lagsins Aftur heim í lokakeppninni telur hann svo ekki vera. „Þetta er ekkert stórmál. Það eru rosalega fáir að túra um Evrópu eins og gert hefur verið,“ segir hann. Ástæðan er peningaleysi og til að mynda mun sænski flytjandinn Eric Saade ekki kynna lag sitt Popular erlendis.

„Menn eru að nota Twitter, Youtube, Facebook og hvað þetta heitir allt til að kynna sig. Það eru aðrar leiðir núna sem voru ekki fyrir hendi fyrir nokkrum árum.“

Lokaundirbúningur Vina Sjonna fer í gang eftir páska og hópurinn flýgur síðan til Þýskalands 1. maí. Hvernig metur Jónatan möguleika íslenska lagsins?

„Ég hef enga hugmynd um það. Í fyrsta skipti geri ég mér enga grein fyrir hvernig þetta á eftir að fara. “- fb