Drogba: Það hjálpar mér að fá að spila

Didier Drogba var maður kvöldsins í Meistaradeildinni því hann skoraði tvö mörk og lagði upp það þriðja í 3-0 sigri Chelsea á Valencia. Chelsea tryggði sér ekki bara sæti í sextán liða úrslitunum heldur einnig sigur í riðlinum.

„Það var mikil pressa á okkur en það eru fjögur lið í riðlinum og það þarf að halda áfram fram á lokadag," sagði Didier Drogba sem kom Chelsea í 1-0 eftir aðeins þriggja mínútna leik.

„Við áttum möguleika á því að vinna riðilinn og það var jákvæður andi í hópnum. Ég tel að pressa getur stundum haft jákvæð áhrif," sagði Drogba sem skoraði líka fyrsta markið í 3-0 sigri á Newcastle í ensku úrvalsdeildinni um síðustu helgi.

„Ég hef verið að bæta mig í síðustu leikjum. Ég hef fengið meiri spilatíma og það er að hjálpa mér mikið," sagði Drogba en 4 af 5 mörkum hans á tímabilinu hafa komið í síðustu fjórum leikjum.