Valskonur upp að hlið KR á toppnum - dæmdur sigur á móti Snæfelli

Valskonur eru komnar upp að hlið KR á toppi Iceland Express deildar kvenna eftir að liðinu var dæmdur sigur á móti Snæfelli en liðin mættust í fyrstu umferðinni. Þetta kemur fram á heimasíðu Körfuknattleikssambandsins.

Snæfell hafði betur í leiknum 70-79. Valur kærði úrslit leiksins á þeim forsendum að einn leikmaður Snæfells, Kieraah Marlow, væri ekki með leikheimild í upphafi leiks.

Aga- og úrskurðanefnd hefur dæmt í málinu og hlýtur Valur sigur í umræddum leik 20-0.

Valur og KR hafa þar með 4 stig í efstu sætum Iceland Express deildar kvenna en Snæfell er eitt af fjórum liðum sem hafa tvö stig en hin eru Fjölnir, Keflavík og Njarðvík.