Mancini: Átti ekki von á þessu

Roberto Mancini fagnaði sem óður væri eftir að Sergio Agüero tryggði Manchester City 2-1 sigur á Villarreal í Meistaradeild Evrópu í kvöld.

Markið skoraði hann í uppbótartíma en sigurinn var afar dýrmætur fyrir City sem var bara með eitt stig eftir fyrstu tvo leiki sína í riðlinum.

„Ég átti ekki von á að þetta myndi enda svona. Við áttum þó skilið að vinna því við sköpuðum okkur mörg færi í leiknum,“ sagði Mancini við fjölmiðla eftir leikinn.

„Markið hans Sergio Agüero var afar mikilvægt. Baráttan um toppsæti riðilsins er nú galopin á ný,“ bætti hann við en FC Bayern mistókst að koma sér í níu stig í kvöld eftir 1-1 jafntefli við Napoli á heimavelli. Bæjarar eru því með sjö stig í riðlinum, Napoli fimm og City fjögur.