Plzen náði ekki skoti að marki í kvöld

Evrópumeisturum Barcelona tókst í kvöld í annað skiptið á jafn mörgum árum að varna því að andstæðingar sínir næðu skoti að marki í Meistaradeildarleik.

Börsungar unnu 2-0 sigur á tékkneska liðinu Viktoria Plzen í kvöld en Tékkarnir áttu ekki eina einustu marktilraun í leiknum. Það var mesta furða að Börsungar hafi ekki unnið stærri sigur því þeir voru með boltann í 71 prósent leiktímans og áttu alls sautján marktilraunir í leiknum - en aðeins fjórar hæfðu markið.

Síðast tókst Barcelona að halda andstæðingum sínum í núll skotum þegar liðið mætti Arsenal í fyrra. Það var í síðari leik liðanna í 16-liða úrslitum en þrátt fyrir það skoraði Arsenal í leiknum - þökk sé sjálfsmarki Sergio Busquets.