Mario Gomez með fernu í 7-0 sigri Bayern

Mario Gomez, framherji Bayern München, skoraði fernu í 7-0 stórsigri liðsins á Freiburg í þýsku úrvalsdeildinni í dag en Bayern fór á toppinn með þessum sigri.

Gomez hefur nú skoraði átta mörk í fyrstu fimm leikjum Bayern á þessu tímabili en hann var markakóngur deildarinnar á síðustu leiktíð.

Fjórða og síðasta mark Gomez kom úr víti en Franck Ribery skoraði tvö mörk fyrir Bayern í þessum leik og varamaðurinn Nils Petersen innsiglaði sigurinn í lok leiksins.

Ryan Babel skoraði tvö mörk fyrir Hoffenheim sem vann 4-0 útisigur á Mainz 05 en Gylfi Þór Sigurðsson var ekki í leikmannahópi Hoffenheim í dag.

Borussia Mönchengladbach og Bayer Leverkusen eru í 2. og 3. sæti þýsku úrvalsdeildarinnar tveimur stigum á eftir Bayern München en Hoffenheim er síðan í fjórða sætinu.