Ingi Rúnar: Það er allt öðruvísi að spila á svona móti

Ingi Rúnar Gíslason úr Golfklúbbnum Kili varð annar í Einvíginu á Nesinu í dag eftir frábæra spilamennsku og harða keppni við Nökkva Gunnarsson sem tryggði sér sigur í bráðabana.

„Það munaði eins litlu og hægt gat. Þetta var annars vandræðalaust hjá mér, það var þægilegt að spila og þetta gekk bara vel. Það var ekkert vesen hjá mér," sagði Ingi Rúnar en hann segir það sérstaka upplifun að taka þátt í þessu móti.

„Það er allt öðruvísi að spila á svona móti og í raun miklu skemmtilegra. Fólk tekur meiri áhættu og þetta er allt öðruvísi mót en maður spilar venjulega. Þetta er í annað skiptið sem ég tek þátt í þessu móti en ég datt út á annarri holu síðast og það var ekki nógu gott," sagði Ingi Rúnar. Kylfusveininn hans á mótinu var ekki hár í loftinu.

„Sonur minn var kylfusveinninn. Hann er mikill golfari og sá um að lesa púttin fyrir mig," sagði Ingi sem starfar sem golfkennari hjá Kili.

„Ég er bara sáttur með daginn þrátt fyrir silfrið. Nökkvi á þetta skilið eftir frábæra spilamennsku," sagði Ingi Rúnar en það má sjá allt viðtalið með því smella hér fyrir ofan.