Ólafur Björn lék frábært golf á EM - Ísland í góðri stöðu

Ólafur Björn Loftsson lék frábært golf á fyrsta keppnisdegi Evrópumeistaramóts áhugamanna sem fram fer í Portúgal. Ólafur lék á 66 höggum eða 6 höggum undir pari og er hann í þriðja sæti í einstaklingskeppninni en íslenska landsliðið er í 9. sæti af alls 20 þjóðum sem taka þátt á 4 höggum undir pari samtals.



Staðan á mótinu:

Átta efstu þjóðirnar að loknum öðrum keppnisdegi komast í A-riðil og keppa þær um sjálfan Evrópumeistaratitilinn. Íslendingar eru aðeins þremur höggum á eftir Finnum sem eru í 8. sæti en Spánverjar virðast vera í sérflokki ásamt Frökkum. Spánn er samtals á -22, Frakkland á -20 og Þjóðverjar eru á -17.

Guðmundur Ágúst Kristjánsson lék á 71 höggi eða -1 og Guðjón Henning Hilmarsson lék á pari. Arnar Snær Hákonarson lék á +1 og Alfreð Brynjar Kristinsson var á +2. Alfreð fékk fugla á síðustu tveimur holunum og lagaði hann stöðu Íslands verulega með þeim hætti. Skor Axels Bóassonar taldi ekki í dag en hann lék á 78 höggum.