Gasperini að taka við Inter

Ítalskir fjölmiðlar greina frá því í dag að Gian Piero Gasperini, fyrrum þjálfari Genoa, verði næsti þjálfari Inter.

Gasperini fundaði með Massimo Moratti, forseta Inter, í dag og Moratti er sagður vera yfir sig hrifinn af þjálfaranum. Svo hrifinn að hann gæti kynnt Gasperini sem þjálfara á morgun.

Gasperini mun taka við þjálfarastöðunni af Leonardo sem er á leið til PSG í Frakklandi þar sem hann verður íþróttastjóri.

Gasperini var unglingaþjálfari hjá Juventus í tæp tíu ár. Hann var rekinn frá Genoa í nóvember á síðasta ári.