Guðmundur Ágúst í forystu eftir frábæran dag

Guðmundur Ágúst Kristjánsson, GR, er í forystu í Símamótinu á Eimskipsmótaröðinni í golfi eftir að hafa spilað frábært golf í dag.

Guðmundur Ágúst er aðeins átján ára gamall en hann lék á 65 höggum á Hvaleyrarvelli í dag eða sex höggum undir pari. Hann fékk sex fugla í dag og tólf pör.

Annar unglingur, Haraldur Franklín Magnús sem einnig keppir fyrir GR, átti einnig góðan dag en hann lék á 66 höggum eða fimm höggum undir pari. Hann fékk heldur engan skolla í dag.

Ólafur Már Sigurðsson, GR, er í þriðja sæti á þremur höggum undir pari samtals en hann lék á 68 höggum í dag. Ólafur Björn Loftsson, NK, kemur næstur á tveimur undir pari en Andri Már Óskarsson, GHR, er í fimmta sæti. Hann var í forystu eftir fyrsta keppnisdaginn en lék á 73 höggum í dag eða tveimur yfir pari vallarins.

Lokakeppnisdagurinn fer fram á morgun og má fylgjast með stöðu mála á golf.is/skor.