Rakel: Vissi að við myndum fá fleiri færi

Rakel Hönnudóttir leikmaður Þórs/KA var ánægð með 4-2 sigur síns liðs á Blikum í dag. Hún sagði baráttuna hafa skilað sér.

„Mér fannst við berjast meira en þær. Við vorum ofan á í henni,“ sagði Rakel.

Þór/KA var marki undir þegar hálftími lifði leiks. Þrátt fyrir það hafði Rakel litlar áhyggjur.

„Ég hafði ekki miklar áhyggjur. Við höfðum fengið fullt af færum og ég vissi að við myndum fá fleiri. Það væri bara spurning um að klára það. Við gerðum það sem betur fer, “ sagði Rakel.

Rakel segir spilamennsku liðsins betri nú eftir heldur brösuga byrjun í mótinu.

„Við byrjuðum ekki eins og við ætluðum okkar. Við hefðum viljað byrja betur en þetta er á uppleið. Mér finnst við vera að spila betur núna og ég held að þetta verði bara betra,“ sagði Rakel.