5 laxar úr Norðurá fyrsta daginn

Stjórn SVFR hóf veiðitímabilið 2011 með því að taka fyrstu köstin í Norðurá í gærmorgun. Kalt var í veðri en gott vatn í ánni og ágætis aðstæður. Bjarni Júlíusson formaður tók fyrstu köstin á Brotið og varð var við lax en náði ekki að setja í hann. Það var síðan Ásmundur Helgason sem landaði fyrsta laxinum á Stokkhylsbrotinu. Það var falleg 84 cm hrygna sem tók Glaða tvíburann.

Tveir laxar til viðbótar komu á land fyrir hádegi, einn á Brotinu og annar á Stokkhylsbroti.  Eftir hádegi komu síðan tveir laxar til viðbótar af Eyrinni og Stokkhylsbroti.

Allt voru þetta fallegir 2ja ára fiskar sem koma vel haldnir úr sjó. Einn af löxunum var 2ja ára hængur sem er nokkuð óvenjulegt.

Á myndinni sem Gunnar Bender tók sjáum við Ásmund með hrygnuna sem hann veiddi á Stokkhylsbroti í gærmorgun.

Birt með góðfúslegu leyfi SVFR