Opnunarhollið í Norðurá hefur tekið saman stangirnar

Opnunarhollið í Norðurá endaði í tólf löxum. Einn lax fékkst í morgun á svæðinu Norðurá II, grálúsugur 80 cm fiskur í Skeifunni að austanverðu.

Menn voru frekar óheppnir í morgun, þá misstust nokkrir laxar í frekar köldu veðri og virðist sem að tökur hafi verið grannar. Sem fyrr urðu veiðimenn varir við lax á Brotinu, á Eyrinni og á Stokkhylsbroti.  Með smá heppni hefði því fimmtán laxa spá Bjarna Júlíussonar auðveldlega getað ræst.

Á svæðinu Norðurá II kom fyrsti laxinn á land í morgun, og sá var plataður upp í flugu sem beitt var með Portlandsbragði, eða "hitchi". Það var Elfar Friðriksson sem náði þar fallegum laxi í innanverðri Skeifunni en skömmu áður hafði verið sett í lax á sama stað sem misstist.

Gott vatn er enn í Norðurá þó hún hafi fallið mikið síðasta sólarhringinn. Orsökin virðist liggja í minni snjóbráð sökum kulda á heiðum.