Ein sterkasta flugan snemmsumars í vatnaveiðinni

Fyrir þá sem eru duglegir að hnýta þá skellum við einni mynd af flugu sem hefur verið gífurlega sterk undanfarin ár í vötnum eins og Elliðavatni, Vífilstaðavatni, Meðalfellsvatni og víðar.  Hún eiginlega veiðir vel í öllum vötnum á þessum árstíma þegar stærsti hluti ætis hjá bleikjunni eru mýpúpur.

Þetta er sáraeinföld hnýting.  Það hefur verið talið best að veiða hana í stærðum 14-18 og þá á púpuöngla án þess að það sé eitthvað skilyrði en hún lítur mjög vel út þegar hún er hnýtt á þá.  Frá miðjum boga er hnýtt 2/3 af legg-lengd með koparvír og 1/3 er síðan hnýttur með brúnu flossi eða peacock.  Margar aðrar tegundir af efni koma þó til greina svo lengi sem það er í dökkum lit.  Flugan er svo hjúpuð með epoxy og það gefur henni harða skel sem gefur þennan fallega gljáa í vatninu.  Þegar mýpúpan lyftir sér upp á yfirborðið til að klekjast glansar ekki ósvipað á hana og það gæti verið eitt af því sem gerir þessa flugu jafn veiðna og hún er.

Í grynnri vötnunum er best að nota flotlínu og vel langan taum, jafnvel eina og hálfa stangarlengd.  Láta fluguna sökkva vel niður og draga inn í stuttum rykkjum.  Það þarf svo að passa að nota granna tauma, því þegar lítil hreyfing er á vatninu sér bleikjan tauminn mjög vel.