Hernandez: Ég er hjá besta klúbbi í heimi

Javier Hernandez er markahæsti leikmaður Manchester United í Meistaradeildinni á þessu tímabili og hefur slegið í gegn á sínu fyrsta tímabili með Manchester United. Hernandez veit þó ekki hvort hann verði í byrjunarliðinu á móti Barcelona í kvöld þegar liðin mætast í úrslitaleik Meistaradeildarinnar.

Hernandez hefur skorað 20 mörk á tímabilinu í öllum keppnum og Chicharito gæti ekki verið ánægðari hjá neinu öðru félagi.

„Ég er hjá besta klúbbi í heimi og allir hjá félaginu er reiðubúnir til að hjálpa þér. Það taka manni allir eins og maður sé einn af fjölskyldunni og þetta er því frábært umhverfi fyrir manna að einbeita sér að fótboltanum," sagði Javier Hernandez sem komst strax inn í lífið á Englandi.

„Það hefur verið lykilatriði fyrir mig að fjölskyldan kom með mér. Ég kann mjög vel við lífið í Manchester. Það er ótrúlegt hvað hefur gengið vel hjá mér og ég er mjög þakklátur guði og fjölskyldu minni," segir Chicharito.

Josep Guardiola, þjálfari Barcelona og besti leikmaður heims, Lionel Messi, hafa báðir hrósað Hernandez í aðdraganda úrslitaleiksins í Meistaradeildinni.

„Ég er þakklátur fyrir þeirra góðu orð og ég þakka öllum sem hafa talað vel um mig. Það er ótrúlegt þegar goðsagnir úr boltanum eru farnir að tala um mig," sagði Hernandez.

Hernandez segist samt ekki ímynda sér að spila við hlið Lionel Messi. „Nei, ég er að spila með frábæru liði," sagði Hernandez en hann veit ekki hvort að hann fái að vera í byrjunarliðinu í úrslitaleiknum.

„Þjálfarinn ræður því hvort ég byrja eða ekki. Við erum allir að undirbúa okkur sem best og ég verð ánægður hvort sem ég spila eða ekki," sagði Hernandez.

„Ég er ekki bara að hugsa um að skora mörk. Ég legg áherslu á að svitna fyrir félagið og hætta aldrei að hlaupa," sagði Hernandez.