Merkel styður Draghi í stöðu seðlabankastjóra Evrópu

Angela Merkel kanslari Þýskalands styður Mario Draghi seðlabankastjóra Ítalíu í stöðu bankastjóra seðlabanka Evrópu (ECB). Þar með er talið nær víst að Draghi taki við af Jean-Claude Trichet þegar sá lætur af störfum í október n.k.

Merkel segir í viðtali við þýska blaðið Die Zeit að hún þekki Draghi og að hann sé áhugaverð og reynslumikil persóna. Þar að auki sé hann á sömu línu og þýsk stjórnvöld hvað varðar stöðugleika í samfélaginu og trausta efnahagsstjórn.

Í frétt um málið á Bloomberg segir að þetta sé fyrsta yfirlýsingin sem Merkel hefur gefið um stöðu bankastjóra ECB og hún var staðfest af talsmanni hennar Steffen Seibert. ”Þetta sagði hún nákvæmlega,” segir Seibert í tölvupósti til Bloomberg.

Nicolas Sarkozy forseti Frakklands tjáði Silvio Berlusconi forsætisráðherra Ítalíu í síðasta mánuði að hann styddi Draghi í æðsta embætti ECB, sem er það næstáhrifamesta í fjármálum heimsins á eftir stöðu seðlabankastjóra Bandaríkjanna. Hið sama hefur Elena Salgado fjármálaráðherra Spánar gert.

Mario Draghi er menntaður hagfræðingur frá MIT og hefur áður unnið hjá Alþjóðabankanum og Goldman Sachs. Þá er hann formaður fjármálastöðugleikanefndar ESB.