Sækja fast að Evrópumaður taki við af Strauss-Kahn

Evrópuríkin sækja það mjög fast að Evrópumaður taki við af Dominique Strauss-Kahn sem forstjóri Alþjóðagjaldeyrissjóðsins. Um það er þó engin sátt í öðrum heimshlutum sem finnst komið að sér.

Evrópa hefur átt framkvæmdastjóri Alþjóðagjaldeyrissjóðsins frá því hann var stofnaður eftir síðari heimsstyrjöldina. Og nú þarf að finna nýjan stjóra eftir að Dominique Strauss-Kahn sagði starfinu lausu vegna kynferðisbrotamáls í Bandaríkjunum. Löndum í Asíu, Suður-Ameríku og Afríku þykir sem Evrópa hafi átt framkvæmdastjórann nógu lengi. Á það var minnst á blaðamannafundi í kínverska utanríkisráðuneytinu í dag og sama hefur heyrst frá Brasilíu og Suður Afríku. Angela Merkel kanslari Þýskalands var þó ekkert feimin við að halda Evrópukröfunni til streitu í dag.

„Við núverandi aðstæður þegar við eigum í erfiðleikum með evruna, en þar kemur AGS mjög við sögu, eru gild rök fyrir því að frambjóðandinn verði frá Evrópu og að hann njóti stuðnings þjóða heims,“ sagði Merkel.

Ýmsir hafa verið nefndir sem arftakar Strauss-Kahns en líklegasti kandidatinn er talinn Christine Lagarde, fjármálaráðherra Frakklands. Hún yrði fyrsta konan sem gegndi embættinu. Lagarde hefur þótt standa sig sérstaklega vel á alþjóðavettvangi í embætti fjármálaráðherra Frakklands. Hún mun einnig hafa áunnið sér traust Angelu Merkel.