Ronaldo: Allir vita að dómararnir eru hliðhollir Barca

Cristiano Ronaldo, leikmaður Real Madrid, tók undir umdeild orð þjálfara síns Jose Mourinho frá því eftir fyrsta leikinn, þegar hann talaði við blaðamenn eftir að Real Madrid datt út úr Meistaradeildinni í gærkvöldi fyrir erkifjendum sínum í Barcelona.

Liðin gerðu 1-1 jafntefli á Camp Nou í gær en Barcelona fór áfram þökk sé 2-0 sigri sínum á Santiago Bernabeu í síðustu viku þar sem Lionel Messi skoraði bæði mörkin eftir að Real Madrid missti mann af velli með rautt spjald.

„Við vissum að við gátum unnið Barca en dómarinn leyfði það bara ekki. Einu sinni sem oftar var það dómarinn sem stóð í vegi fyrir okkur," sagði Cristiano Ronaldo sem er enn dýrasti knattspyrnumaður heims.

„Dómarinn í fyrri leiknum rændi okkur möguleikanum á því að komast í úrslitaleikinn. Þeir sem vita eitthvað um fótbolta sjá það að Barcelona fær alltaf hagstæða dómgæslu," sagði Ronaldo.

Real Madrid komst í 1-0 í leiknum í gær en mark Gonzalo Higuain var dæmt af þar sem dómarinn taldi að Ronaldo hefði fellt Javier Mascherano.

„Markið hans Higuain var löglegt. (Gerard) Pique ýtti mér og ég lenti á Mascherano. Mascherano var ekki vanur því að láta sig detta á Englandi en hann hefur tekið þann ósið upp eins og allir sem spila hér," sagði Ronaldo svekktur eftir leikinn en einhverjum finnst hann þarna þó vera að kasta steinum úr glerhúsi.

„Barcelona hefur mikil völd utan vallarins. Ég tel ekki að Barcelona hafi verið betri en við en þeir fengu bara mikla hjálp frá dómurunum," sagði Ronaldo.